【保寶達人】「喬裝客戶檢查計劃」應表揚良好做法 為業界樹立標準

金融監管機構呢幾年完善好多法規，透過提升監管要求，推動業界加強培訓同專業性，當每次有新指引同措施，亦同業界有商有量。好似行家都有聽過上年底保監局、金管局及積金局宣布聯合展開「喬裝客戶檢查計劃」，一開始引起業界唔少迴響，但係保監亦都好快作出澄清同回應，呢點值得一讚！

其實「喬裝客戶」（又稱「神秘顧客」）喺服務業好普遍，對於保險業亦唔係咩新鮮事。今次監管機構先旨聲明會「喬裝客戶」，可以話係畀足提示。而一啲行業團體同保險公司，亦可以即時借呢次事件提醒業界朋友，堅持返保險行業銷售過程嘅專業性，尤其是係對住一啲陌生客戶。

雖然因為疫情2月開始再度大爆發，限聚令再度影響咗社交會面，有無影響到「喬裝客戶檢查計劃」嘅進度，相信都好難估計到。所以到底今次「喬裝客戶檢查計劃」最後會做成點，相信仲要一年半載等到個結果出嚟先知。

不過保寶達人就好希望今次份報告，可以更中肯持平咁反應到保險中介人嘅專業性。首先，由於今次調查係包括埋銀行，雖然好多時佢哋銷售嘅產品性質係一樣，但銀行職員同保險中介人嘅角色定位始終係有分別，到時個調查結果會唔會區分得出邊啲係銀行職員，邊啲係保險中介人？如果區分得到，就更準確反映到保險中介人嘅銷售表現同水平，更有參考價值。

另外一點都好重要嘅，就係除咗唔好嘅嘢要批評、要求作出改善之外，有良好嘅做法都要用一定篇幅同引用個案報埋出來，正因為有呢啲正面嘅個案，就可以成為其他行家嘅Best Practice，對提升整體銷售過程嘅專業性都好重要！

保寶達人 – 為您八盡保險天下事

更多保寶達人手記Click Here