【保寶達人】監管機構出手+加息夾擊 保單融資末日到來?

有槓桿效應嘅「保費融資」(Premium Financing)呢幾年好流行,保寶達人甚至聽過有人游說客戶按咗層樓套現去做,不過最近監管機構開始出招整頓,加上美國加快加息,之後可能冇呢支歌仔唱喇!

 

4月初保監局同金管局就發出一份指引,釐清有關利用「保費融資」買人壽保單嘅監管標準同規定,當中最最最重要嘅重點係流動資產嘅計法──物業不應當作流動資產。如果排除咗層樓,咁唔少客戶已經唔使諗,因為佢哋最大嘅資產就係層樓,如果要變賣佢哋又唔敢,所以傳統嘅槓桿就做唔到喇。

 

雖然今次兩間監管機構都指出物業唔應該當作流動資產,但又唔係唔可以當成資產一部分喎!但要計,就要將物業市值除二,減去餘下按揭金額,之後再除二,咁基本上都無乜剩,咁擺明唔鼓勵銀行作以上計算,用來撐大客戶資產啦!

 

好喇,就算流動資產夠數,唔好忘記仲有加息隱憂,所以就算做到槓桿都要停一停,諗一諗。近年「保費融資」咁流行,一大原因係低息環境比較易賺息差,但而家開始進入加息期,只要銀行加息,成件事就唔同晒。假設貸款利率升至2.5%至3%,而保單嘅非保證紅利兌現唔到,保單紅利就有可能冚唔到利息成本,到時呢啲槓桿操作就會失效,如果係單冚單甚至有機會「爆煲」。

 

就算唔係因為加息,始終銀行借錢俾客戶,低息唔係奉旨,有大隊長就聽聞有客戶因為戶口現金餘額唔符合要求,導致銀行大幅加筆融資貸款嘅利率,個客想轉走又要成筆貸款Full Pay贖回先得,最後攪到不成事!

 

對於監管機構收緊「保費融資」指引,保寶達人都覺得時機適合,始終相關嘅投訴近年累積落唔少。但宏觀啲咁睇件事,其實保寶達人都戥啲保險公司唔抵,「保費融資」出咗問題,好多時好大可能出喺銀行筆槓桿貸款身上,保險公司只係賣單,主力關注承保風險同保單內容,客戶符合要求就批,至於個客同銀行之間嘅融資操作,其實唔關保險公司事。但係叫得做「保費融資」,出咗事普通市民就覺得一定係關保險事,又或者以為係Agent亂咁叫人投保,真係殃及池魚,銀行先至係今次新指引要提醒嘅主要對象。

 

雖然而家做保費融資嘅難度高咗,但大家都唔使咁擔心,相信好多同業都會識得變通,以合規嘅方案解決難題,繼續幫到有融資需要嘅客戶發揮槓桿效應。

 

(編者按:因應監管機構有所回應,有關保費融資內容最新澄清事項,請到以下連結)

保費融資文章內容澄清

 

保寶達人 – 為您八盡保險天下事

更多保寶達人手記Click Here