【保寶達人】Agent Channel跌Bank Channel升之謎?保險業上半年數據背後的啟示

保監局8月底公布咗保險業上半年臨時統計數字,今年上半年保險業喺第五波疫情衝擊下都有唔錯嘅成績,期內毛保費總額達到2,999億元(港元,下同),較去年同期只係跌咗2.3%,主要包括個人人壽及年金(非投資相連)業務嘅長期業務保費收入有2,207億元,都只係微跌2.4%。睇完係咪覺得行業韌力相當強勁呢!不過真相唔係咁簡單,睇落去你就知。

 

整體數字只係跌少少已經唔容易,單睇新造業務保費仲更加振奮。上半年長期業務(不包括退休計劃業務)的新造保單保費為819億元(上升1.7%),主要包括個人人壽及年金的非投資相連業務,其新造保單保費為730億元(上升9.1%),兩樣都有升,係咪真係有咁多新單先?

 

有就係有,不過來源係邊度就值得留意。有大隊長就話好多Agent團隊其實都唔覺新造保單多咗好多,咁多咗啲單去咗邊度呢?之唔係總有一間喺左近,連手機都用到嘅銀行囉!

 

有大隊長就估計,上半年保險業其實暗暗起風雲──Direct Agency Channel跌、Bank Insurance Channel升嘅格局逐漸成形,特別係投資相連壽險(ILAS)呢個戰場,由銀行帶起嘅產品改革同PLP產品面世,反映近年銀行攻保險業務方面係積極咗好多。不過又咁講,部分保險公司同銀行嘅關係算係互惠互利,佢哋嘅保險產品會經合作夥伴銀行渠道銷售,最後Sales都計入保險公司收入,只不過就唔係經Direct Agent Channel咁解。

 

面對進擊的銀行,有大隊長就認為,銀行有佢哋自己嘅優勢,只要個客喺銀行有戶口,RM就掌握晒客戶所有財務資料,做財務分析同計劃先天就比保險Agent有優勢。保險Agent要靠估又或者花時間建立關係去了解嘅,銀行RM就㩒幾個掣就睇到客戶戶口有幾多錢,簡直係睇住嚟食。

 

係PLP戰場,銀行而家可以話佔有先機,不過其實ILAS市場喺2016年之後,經已大不如前。ILAS最旺嘅時期要數返2006至2008年嘅高峰期,當時差唔多佔保險市場成一半份額,只不過畀2008年金融海嘯打沉咗,加上監管亦收緊咗唔少,所以之後都再去唔返當時嘅高峰。好似今年上半年,個人人壽及年金(投資相連)業務保費收入只有151億元,佔整體市場只係5點幾個巴仙,可能係「塞翁失馬,焉知非福」都唔定呢!

 

所以,Agent團隊嘅火力應該放返係保障同派息產品方面,同用最重要嘅專業服務嚟打動客戶,夠機動,識靈活走位,咁就「追擊的大行」都無有怕啦!

 

保寶達人 – 為您八盡保險天下事

更多保寶達人手記Click Here

 

任何於本文章的評論或意見純屬來自個別嘉賓/隊長等,並未代表保協之立場。