【保寶達人】點樣避免保險客戶走去搵《X張》投訴?(上集)

上次篇《大台《X張》御用保險大隊長 背後有苦自己知》提到,有大隊長經常同傳媒交手,以行業人士中立態度,為爭議個案提供專業分析角度。咁作為保險業嘅監管機構,保監局對於傳媒嘅相關報道甚至渲染,又可以做啲咩呢?

 

唔講唔知,保監的確有關注呢項趨勢,仲係行業會議入便進行過討論,大隊長都有份參與,仲發表咗唔少意見。首先業界都認同,而家保險客戶鍾意搵《X張》呢類電視節目,係因為佢哋相信傳媒嘅影響力,可以有效咁幫佢哋解決問題。

 

不過好多資深行家都知道,傳媒為保險爭議個案「加鹽加醋」,情況其實一直都存在,但係講緊同一整年以千億計嘅保費來講,爭議個案比例其實真係極低。另一方面,好多時爭議都唔關中介人嘅事,有唔少個案都同賠償手續即喺CS有關,因為喺疫情初期,保險公司都面對人手短缺問題,無可避免地賠償比以前拖慢咗,咁都會引發多咗投訴。

 

有大隊長就覺得,保險行業應該創建一個畀自己客戶「初步投訴」嘅平台,因為如果客戶首先去到行內嘅平台,就搵到可能嘅解決方案,唔得先去保監甚至調解,總好過第一時間就走去搵《X張》吖!雖然電視台有佢哋嘅創作自由,但佢哋嘅出發角度總會考慮到收視,節目時間又有限,表達方式同提供嘅資訊未必夠全面,所以有空間提供一個專業平台畀市民投訴有門。

 

當然,要搞一個咁樣嘅平台,應該會有唔少技術問題需要解決,但呢啲可以透過保監牽頭帶領業界協商嘗試解決,因為相信保監都同意,而家係關注呢個問題嘅好時機,唔少傳媒或者KOL發布嘅唔同訊息,真係好容易影響客戶對行業嘅信心。

 

下集再同大家分享更多大隊長對成立「初步投訴」平台嘅建議。

 

保寶達人 – 為您八盡保險天下事

更多保寶達人手記Click Here

 

任何於本文章的評論或意見純屬來自個別嘉賓/隊長等,並未代表保協之立場。