【保寶達人】解構首季內地訪客生意倍倍倍升之謎

之前保寶達人曾經預告過，通關後內地訪客新造業務保費必定爆升，結果保監局嘅統計數據顯示達到96.13億港元，較一年前勁升2,686.4%（近27倍），新造保單數目34,506份，同樣勁升3,253.4%（逾32倍）。

內地訪客來港投保爆升，保監局就話係跨境人流恢復正常，釋放壓抑多時嘅需求，加上去年同期基數較低。的確唔少大隊長都話，第一批簽嘅單好多都係呢幾年累積落嚟嘅客戶，講明一通關就落嚟簽，所以生意好返係意料中事。

好多人想知而家內地訪客生意返到疫情前水平未？今年第1季收96億港元，相較2019年第1季嘅128億港元，大概係75%，不過唔好忘記今年2月初先正式通關，即係2個月唔夠就做到近百億。再睇真啲數據，首季內地訪客新造保費佔個人業務總額大約1/5（20.5%），相比2019年同期嗰陣超過1/4（26.4%）仲差少少，但剛剛先開始上返軌道，初步有咁嘅成績已經算唔錯。

個別Agent出現「報復式簽單」情況，主要係疫情前主力做內地訪客生意嘅團隊，早幾個月經常北上，成日都唔係香港。聽聞第1季就做到上年一整年生意，又或者一張單就做到MDRT嘅Agent都唔少。

今年第1季內地訪客喺香港買嘅保單當中，終身壽險、危疾同醫療保險分別佔56%、33%同5%，如果以保單數目計，終身壽險就升得最勁，爆升65倍。下期再同大家剖析點解內地訪客咁鍾情呢幾類保險產品。