保監出招！分紅保單「兩年一檢」應該點理解？

呢兩日放假同啲保險業界朋友飲茶，有朋友提到保監局就分紅保單推出嘅新監管安排，由以往較被動嘅利率審查，變成每兩年按既定機制檢討一次利益說明利率上限，佢話有同事第一個反應係問：「產品會唔會愈做愈難？」、「市場競爭會唔會受影響？」其實如果將眼光放遠少少，呢套機制固然可以視為一道限制，但亦可能係推動保險業更成熟、更健康嘅一步。

點解咁講？因為市場嘅可預測性相對係提高咗。以往只要市場環境有變，業界難免會擔心監管要求會唔會突然有調整，令到產品設計、資產配置，以至前線部署都較難作長期規劃。新安排就將檢討機制講得更清楚，保監局會參考多家投資銀行及資產管理公司嘅長期市場預測，再扣除合理利差去釐定上限；同時亦加入50個基點嘅平滑機制，避免因短期市場波動而頻繁調整。規則愈透明，可以預期市場會愈穩定，保險公司亦更容易按住節奏部署長線策略，而唔係每次都因應政策消息疲於應付。

從另一個角度睇，新制度亦有助市場變得理性競爭。過去分紅保單競爭激烈，市場難免出現「鬥高預期回報」嘅情況，客戶亦容易將注意力集中喺利益說明數字。當利益說明利率有較為一致嘅監管框架，大家可以比較嘅就唔再只係一組假設回報，而係公司真正嘅實力，例如分紅實現率、投資管理能力、風險控制水平，以及長期兌現承諾嘅能力。對投保人而言，呢種競爭模式反而更加健康，對香港保險市場建立長遠公信力，以至鞏固國際財富管理中心嘅定位，亦有一定幫助。

當然，當市場採用較一致嘅利益說明框架，各家公司喺產品數字上嘅差異預期會有所收窄，部分產品睇落亦可能變得愈來愈相似。如果未來市場預測下調，利益說明利率上限亦可能跟隨調整，前線代理就唔可以再單靠一個較高嘅長線回報預測作為主要賣點。呢個改變，對部分習慣以數字吸引客戶嘅團隊，應該有一定挑戰。

簡單嚟講，保監局今次推行「兩年一檢」機制，與其理解為收緊監管，不如視為建立一套更具透明度、更有紀律嘅市場框架。短期內，業界可能需要時間適應，而新產品策略、前線銷售模式以至客戶教育都要重新調整；但長遠而言，當市場競爭由鬥數字變成鬥實力，最終受惠嘅相信仍然會係整個香港保險業，以及每一位希望透過保險作長遠財富管理嘅客戶。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。