外遊必備「旅遊三寶」大搜查

相信每個人心目中都有各自的「旅遊三寶」。每年一到聖誕，我們保寶一家都會相約一同外遊，今趟在出發之前，八卦孻妹我特別進行了一次保寶家族成員「旅遊三寶」大搜查！不如看看你的「旅遊三寶」有無上榜啦！

保寶孻妹因為做空姐的關係，經常要周圍飛同住酒店，而我每次出差都一定自備「三寶」──拖鞋、運動毛巾同檸檬。唔講唔知，在外地不是間間酒店都衛生，表面睇落企企理理，但可能清潔得十分求其。剛入職時空姐同事教路，出差要自攜厚底膠拖鞋，避免雙腳接觸地板，尤其不要赤腳走入浴室，因為地板可能充滿細菌，如雙腳有傷口，受感染會十分麻煩。自帶運動毛巾亦是同一道理，我盡量不會使用酒店的毛巾，因為不知之前由甚麼住客用過。即使酒店會清洗及消毒，但始終用屬於自己的用品最穩陣，而且運動毛巾輕身又快乾，非常之適合旅行用。

有空姐三寶更放心

檸檬用途就較為特別喇，我在外地多數飲樽裝水，但有時去到天寒地凍的地方，在酒店都好想飲杯熱茶或咖啡，這個時候就必須用到電熱水壺，但第一煲水要放半隻檸檬落去一齊煲，去除壺內的黃漬及沉澱物，而煲滾後不要飲用，放一陣後再倒掉，第二煲水先好飲用呀！

當我問保寶爹哋同靚太，他們說以前的「旅遊三寶」是遊戲機、即食麵及零食，爹哋話當年搭長途機無娛樂系統，帶住一部手提遊戲機出遊，搭飛機就可以用來解悶。靚太就話當年一定要帶即食麵同零食，因為唔知當地食物是否一定合胃口。

旅遊保險要知條款

至於保寶大少的「旅遊三寶」，就有可在海外提款的銀行卡、Wifi蛋同旅遊保險。大少讀書時經已隻身周遊列國，身在外地遇上旅費不足，海外提款功能就可解燃眉之急，甚至在部分旅遊熱門目的地如台灣，在當地銀行櫃員機提取現金，匯率可比在香港事先兌換更好，有需要時可好好利用。

大少平日機不離手，如果外遊無Wifi都唔知點算。佢話如果一班人一齊外遊，租一隻Wifi蛋共用就最抵，因為可以無限上網，而且租Wifi蛋比以前方便好多，而價錢平均一日幾十蚊就有。

上年孻妹剛入職做空姐，大少經已叫我買定全年旅遊保險，因為一旦在外地遇上突發或意外事件，都有一定保障。不過，佢提醒上網買旅遊保不應只貪平，無論購買單次或全年旅遊保險，都要留意保單條款及細則，例如其中的「不保事項」、財物保障是否包括手機及電腦、索賠時所需要的文件等。