出外旅遊 提防麻疹
踏入5月，雖然無乜長假期，但相信唔少朋友會考慮趁勞動節或佛誕來趟快閃旅行，而喜愛到台灣、日本旅遊的朋友，近期大概最關心當地嘅麻疹爆發情況。由於麻疹屬一種高傳染性疾病，所以今次想同大家分享一下有關麻疹嘅資訊，希望幫到大家做好準備，唔使估估下。
本港嘅兒童免疫接種計劃喺1967年已加入麻疹疫苗，並喺1997年轉為兩針，同年下半年為超過100萬名1至19歲人士多注射一劑疫苗，當時嘅覆蓋率非常高。衞生署衞生防護中心總監黃加慶表示，大部分嘅香港市民對麻疹有免疫力，毋須恐慌，但1歲以下嬰兒，或對麻疹無免疫力嘅孕婦就不宜前往目前正爆發麻疹嘅地方。
因為懷孕期間唔能夠接種麻疹疫苗，對麻疹無免疫力嘅孕婦或計劃懷孕嘅婦女唔應該到沖繩等爆發麻疹嘅地方旅遊，而兒童免疫接種計劃嘅第一針麻疹疫苗1歲才注射，所以1歲以下嬰兒亦都不宜前往這些地方。以下為大家整理了部分麻疹資訊，供大家參考：
麻疹傳播途徑
- 可以透過空氣中的飛沫，或直接接觸病人的鼻喉分泌物而傳播；
- 透過被鼻喉分泌物弄污的物件傳播的機會較低；
- 病人從出疹前4天至出疹後4天內可把病傳染給別人。
麻疹的病徵
- 受感染的人初時會發燒、咳嗽、流鼻水、眼紅及口腔內出現白點；
- 3至7天後皮膚會出現污斑紅疹，通常會由面部擴散到全身，維持4至7天，亦可能長達3個星期，留下褐色斑痕或出現脫皮；
- 情況嚴重者的呼吸系統、消化道及腦部會受影響，引致嚴重後果，甚至死亡。
預防麻疹的方法
- 保持良好的個人衞生，經常保持雙手清潔，尤其在觸摸口、鼻或眼之前、觸摸扶手或門把等公共設施後，或當手被呼吸道分泌物污染時；
- 當出現呼吸道感染病徵，應戴上外科口罩，停止上班或上學，避免前往人多擠逼的地方，及盡早向醫生求診；
- 病童在出疹後的4天內應留在家中休息，不應返回學校／幼稚園／幼稚園暨幼兒中心／幼兒中心，避免將疾病傳染給未有免疫力的人；
- 保持良好的環境衞生，定期清潔和消毒常接觸的表面，如使用 1 比 99 稀釋家用漂白水消毒，待15-30分鐘後，用水清洗並抹乾，金屬表面則可用70%火酒清潔消毒；
- 保持室內空氣流通，避免前往人多擠逼或空氣流通欠佳的公眾地方，高危人士在這些地方逗留時可考慮佩戴外科口罩；
- 防疫注射是最有效預防麻疹的方法。
