簽單地點急轉彎

之前本欄已多次提過，而家內地人擔心來港唔安全，令買保險人士大減。有偏重內地客業務嘅Agent話，以往暑假會訂定十幾廿套迪士尼同海洋公園入場門票，送俾內地客戶來港玩，順便簽埋單，但今年一套都送唔出呀陰公。

以前內地客當道嗰陣，保險公司位處尖沙咀同銅鑼灣嘅簽單中心，周末通常都人頭湧湧，啲客排住隊等簽單，排親閒閒地都成粒鐘；但係過去呢兩個月尖沙咀、銅鑼灣同北角等區就首當其衝，有幾個禮拜莫講話簽單，直情人影都無隻。

酒店Book房簽單 雪中互送炭

有保險公司就嘗試變陣，租用機場附近嘅酒店會議室，設立流動認證中心，方便內地客唔使出市區，一落機就可簽單。不過最近機場都開始發生衝突事件，於是另一間行業龍頭公司就計劃，唔止喺機場，仲打算喺西九高鐵站都設立簽單中心添！

其實所謂流動簽單中心，只係喺酒店長book一間meeting room，設備方面要符合規定要求咁解。呢種做法係咪有效，保寶達人唔敢講，不過有大隊長就話有好過無，橫掂大部分酒店家陣都無生意，有保險公司肯租房，酒店方面應該好歡迎，價錢亦應該平唔少，就當係互相幫忙啦！

借糧渡困境 有得必有失

其實，流動簽單中心都只係權宜之計，因為重點唔係喺邊度簽，而係內地客幾時先放心落嚟。如果情況持續，好多業績唔上唔落嘅前綫Agent可能撐唔住，畢竟有唔少人係無單無飯開，尤其有家庭同供樓負擔嗰班真係高危份子。保寶達人聽聞有保險公司現正籌備「收入保障計劃」，即係「借糧」，為Agent提供免息貸款。不過，要得到支援自然要有義務付出──就係喺還款期內唔准離職。

另外有班上晒岸嘅資深業界人士就話，希望加快推進大灣區建設，呼籲政府同內地銀保監等機構，盡快研究容許香港保險公司喺深圳設立保險諮詢服務中心，提供簽單以外嘅諮詢、續費、索償等業務，長遠甚至研究中介人牌照互通等事宜，為從業員開拓更大嘅市場。

保寶達人 – 為您八盡保險天下事

更多保寶達人手記Click Here