新冠肺炎康復者仲有冇得買保險呢？
而家疫情未退，加上經濟低迷，危疾保對家庭嘅保障更加緊要。上次提到嘅新型危疾保，除咗保一般嘅危疾之外，仲包埋世衞定義嘅新型傳染病，例如新冠肺炎同豬流感等，而且以現金一筆過方式，按照受保人嘅入院嚴重情況作出賠償。不過你有無諗過，可能有啲人想買都買唔到？
講緊嘅係新冠肺炎康復者，早排討論區有網友出Post問：「屋企人中咗新冠肺炎，康復之後仲可唔可以買保險？」，係網上引發熱烈討論。而家累積確診人士已經超過5,000人，佢哋不幸中招但總算執翻身彩，想加多啲保障都係人之常情。
有大隊長就話，因為新冠肺炎屬於新型傳染病，一來後遺症及復發機會難以預計，二來治療過程中用到嘅藥物潛在風險，亦係未知之數，所以保險公司審批康復者嘅投保Case，肯定會當成特殊個案加倍審慎。
特別係入過深切治療病房（ICU）嘅患者，好多都需要儀器輔助呼吸或者插喉，就算最後好返，都可能留低好似肺纖維化嘅後遺症，相信被拒保嘅機會比較高。不過，今次新冠病毒雖然傳染力強，但破壞力就比沙士細，絕大部分患者都能夠康復出院，而後生嗰啲更加可能連病徵都無，自己好返晒，所以係咪可以成功投保，都係要視乎投保人當時嘅身體情況而定。保險公司會就投保人披露嘅健康同康復狀況，向醫院索取醫療報告，甚至會要求投保人接受肺功能相關嘅測試，同提供新冠肺炎病毒檢測呈陰性，或者已產生病毒抗體嘅醫學證明之類，總之成個申請程序一定比健康嘅人更複雜，審批時間更長。
睇返當年沙士，因為沙士患者好多都係重症，康復後想再買保險，好多都因為曾經患過嚴重疾病而有影響。有大隊長就回顧，當年沙士康復者投保需要以當時嘅身體狀況同過往病歷紀錄作為核保參考之外，就算最終受保，都好大機會要加保費。
所以幾時都話：「喺健康同年輕嗰陣買保險係最好」。好多人都等到有急病，需要醫療保障嗰陣先諗要買保險，但好多時經已遲咗。唔想有事先後悔嘅話，就要及早做好風險管理，搵你個Agent傾傾喇！
