智能轉型新浪潮 AI應用利多於弊？

每當提到人工智能（AI），大家會想到咩？ChatGPT、自動駕駛、機械人？其實AI嘅應用已經滲透到各行各業，保險業亦唔例外。近年，保險公司紛紛擁抱科技創新，為客戶帶來前所未有嘅便利體驗。究竟AI如何改變保險業嘅面貌？

早排出席一個業界活動就聽到有資深保險大隊長表示，AI為代理同客戶都帶來巨大便利。以理賠為例，而家客戶只需自行上傳文件，幾分鐘內就可以透過指定收款渠道收到賠償，大大節省公司嘅人力成本。投保程序亦變得更快捷，有代理分享試過客戶喺公司辦公司簽完份年金保單，落到樓下已經即時生效！

醫療保險嘅投保同理賠亦都實現咗數碼化。以往需要提交相關文件，仲可能要等兩三個星期。而家只需喺平板電腦上填寫電子表格，投保或理賠都可以短時間內處理。當然，呢類個案都仍然限於一啲簡單嘅產品同理賠，但可以想像到隨住科技不斷發展，即使係其他複雜啲嘅產品，往後嘅處理時間相信只會有減無加。

另一位在場嘅保險大隊長就話，而家保險公司提供多個投保渠道，除了傳統嘅代理、經紀同銀保之外，網上平台都係一個重要渠道。佢話渠道多咗，對客戶嚟講一定有好處，至少有得揀嘛。就好似習慣網上理財嘅年輕人可以自助投保，而年長啲嘅朋友，就可以繼續搵代理幫手。不過，佢同時提到一點值得思考嘅係，當投保、理賠變得可以線上處理，變相亦減少咗代理人同客戶見面溝通嘅機會，可能會影響續保率同轉介生意。言下之意，即係代理人都要配合科技革新，諗諗點同客戶建立更緊密嘅關係。

無獨有偶，為推動保險業數碼轉型，保監局今年8月就同多間保險公司一齊推出「人工智能促進計劃」。保監局主席姚建華就話，AI正重塑全球保險業格局，創新應用遍及核保、理賠、詐騙偵測、客戶服務同銷售支援等領域。香港具備優越嘅數碼基建、有利嘅政策環境和蓬勃嘅保險市場，有潛力成為區域AI樞紐。計劃獲7間保險公司承諾參與，將會喺香港設立卓越中心培訓人才，並與業界分享經驗。想知計劃會為業界帶嚟咩優勢，咁就要拭目以待。

講到尾，面對科技浪潮，保險業的確經歷緊前所未有嘅轉變。AI為行業帶來效率提升同創新服務，但亦衍生出新嘅考驗。你認為未來保險業會變成點？傳統代理嘅角色會如何演變？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。